നമ്മൾ വെറും ചേരിപ്പട്ടികളോ?

ഭാരതത്തിന്റെ സ്പന്ദനമായ മുംബൈ നഗരത്തെ Slumdog Millionaire എന്ന സിനിമയിലൂടെ ചിത്രീകരിച്ചു് ലോക ശൃദ്ധ പിടിച്ചുപറ്റിയ വിവരം നിങ്ങൾ അറിഞ്ഞിരിക്കുമല്ലോ.

മുംബൈ നഗരത്തിലെ ദരിദ്ര ജനങ്ങളെ ചേരിപ്പട്ടികൾ എന്നു വിളിച്ചതിൽ പ്രതിഷേധിക്കാൻ ആ നാടിന്റെ രക്ഷകൻ എന്നു സ്വയം വിശേഷിപ്പിക്കുന്നവർ പോലും പ്രതിഷേധിക്കാതെ പോയതിൽ എനിക്ക് അത്ഭുതം തോന്നുന്നു. അജ്ഞരായ സാധാരണക്കാർ ഈ സിനിമ ഒരു സ്വദേശ നിർമിത സിനിമയായി കാണുന്നുണ്ടാകും. എന്നാൽ വിദേശത്തു് ഭാരതത്തിന്റെ വാണിജ്ജ്യ തലസ്ഥാനത്തെ കുറിച്ചും, മുംബൈ പോലിസിനെ കുറിച്ചും, അവിടുത്ത പാവപ്പെട്ട ജനങ്ങളെ കുറിച്ചും തെറ്റായ ഒരു ചിത്രമാണു ഇതിലൂടെ പ്രചരിക്കപ്പെടുന്നതു്.

ഹിന്ദുക്കളുടേയും, മുസ്ലീമുകളുടെയും ആരാധന പാത്രങ്ങളെ കുറിച്ചു് ചിത്രങ്ങൾ രചിച്ചാൽ ഇന്ത്യയിലെ മത വികാരങ്ങൾ വൃണപ്പെടും. എന്നാൽ പാവപ്പെ ജനങ്ങളെ അമേദ്യത്തിൽ മുങ്ങി കുളിച്ച വെറും തെരിവു പട്ടിയെ പോലെ വിദേശരാജ്യങ്ങളിൽ ചിത്രീകരിച്ചാൽ ഒരു ചുക്കും ഉണ്ടാവില്ല. അതു കണ്ടു കയ്യടിക്കാനും ജനം ഉണ്ടാകും.

80-കളിൽ ഇന്ത്യയിൽ ഇറങ്ങിയ അനേകം സിനിമകളുടെ ഒരു സങ്കര ചിത്രമാണു Slumdog Millionaire. പാമ്പാട്ടികളുടെ നാട് എന്ന പാശ്ചാത്യ സംകല്പത്തിന്റെ ഒരു പുതിയ പതിപ്പായി മാത്രമെ ഈ സിനിമയെ കാണാൻ കഴിയു. മുംബൈ അധോലോകത്തെ കുറിച്ചും ചേരികളെ കുറിച്ചും അനേകം സിനിമകൾ നമ്മൾ കണ്ടിട്ടുണ്ടു്. സാങ്കേതിക പരമായി Slumdog Millionaire ഉയർന്ന നിലവാരം പുലർത്തി എങ്കിലും, Deewar, Sathya, Company, Chandni bar, എന്നീ സിനിമകളെകാൾ പുതിയ ആശയങ്ങൾ ഒന്നും തന്നെ ഇതിൽ കാണാൻ എനിക്കു് കഴിഞ്ഞില്ല.

ഇതോടു കൂടി ഒരു കാര്യം മനസിലായി ഇന്നും ഇന്ത്യയിൽ സായിപ്പിനെ കണ്ടാൽ കവാത്തു മറക്കുന്നവർ ഉണ്ട്.

ചിത്രകാരൻ എന്ന ബ്ലോഗറോടു് ഒരഭ്യർത്ഥന

നല്ലതുപോലെ ഭാഷ കൈകാര്യം ചെയ്യാൻ അറിയാവുന്ന ഒരു വ്യക്തിയാണു് താങ്കൾ. ചിത്രകാരൻ അവതരിപ്പിക്കുന്ന പോസ്റ്റുകളിൽ പലതും കാര്യമാത്ര പ്രസക്തിയുള്ളതും നല്ല രീതിയിൽ ചർച്ചകൾ നടക്കേണ്ട പോസ്റ്റുകളും ആണു്. പക്ഷെ പലപ്പോഴും വായനക്കാരന്റെ ശ്രദ്ധ താങ്കളുടെ അസഭ്യത്തിൽ പോയി നില്കുന്നതായി കാണാം. ആചാരങ്ങളെ ചോദ്യം ചെയ്യാം. ദൈവ സങ്കല്പങ്ങളെ ചോദ്യം ചെയ്യാം. ജാതി വ്യവസ്ഥയെ ചോദ്യം ചെയ്യാം. ലോകത്തിലെ ഏതു് പാചക ക്കുറിപ്പിനെ വേണേലും ചോദ്യം ചെയ്യാം. പക്ഷെ അതെല്ലാം വസ്തുനിഷ്ടമായ ഒരു പഠനത്തിന്റെ അടിസ്താനത്തിൽ ആയിരിക്കണം.

മുമ്പൊരിക്കൽ താങ്കൾ ഒരു പോസ്റ്റിന്റെ commentൽ ഇപ്രകാരം പറഞ്ഞു:
"കൃസ്തുവിനെ തല്ലിക്കൊന്ന് കുരിശില്‍ കെട്ടിത്തൂക്കിയ കൃസ്ത്യാനികള്‍ "

ബൈബിൾ ഒരിക്കൽ എങ്കിലും വായിച്ചിട്ടുള്ള ഒരാളിനു് പോലും അറിയാം താങ്കൾ എഴുതിയതു് അറിവില്ലാതെ എഴുതിയതാണെന്നു. ഇതുപോലുള്ള് വരികൾ ചില വിശ്വാസികൾ ആക്ഷേപമായി കാണും എന്ന കാര്യത്തിൽ സംശയം വേണ്ട. കാരണം താങ്കളുടെ ആ പ്രഖ്യാപനത്തിൽ വിശതീകരണങ്ങളോ, തെളിവുകളോ ഒന്നുമില്ല. താങ്കൾക്ക് അറിയാവുന്ന കാര്യങ്ങൾ എഴുതുക. അറിയാത്ത കാര്യങ്ങൾ പഠിച്ച ശേഷം എഴുതുക. തെറ്റുകൾ സംഭവിച്ചിട്ടുണ്ടെങ്കിൽ അതു് തിരുത്താൻ ശ്രമിക്കുക.

ദേവിയുടെ ചിത്രത്തേകുറിച്ചുള്ള താങ്കളുടെ അവലോകനത്തിൽ തെറ്റില്ല എന്നാണു് ഭൂരിഭാഗം വായനക്കാർ surveyയിലൂടെ തിളിയിക്കുന്നതു്. അതു് കോടതിയിൽ പോയാലും ജയിക്കാൻ വകുപ്പില്ല എന്നും എന്റെ കഴിഞ്ഞ പോസ്റ്റിൽ എഴുതിയിട്ടുണ്ടു്. പക്ഷെ അസഭ്യവർഷം അതിനെ കുറിച്ചാണു് എനിക്ക് പറയാനുള്ളതു്. ഈ പറയുന്ന ഞാനും ചില്ലറ തെറിയൊക്കെ വിളിച്ചിട്ടുള്ളവനാണു്. പക്ഷെ ചിത്രകാനപ്പോലെ സാമൂഹിക അടിസ്ഥാനത്തിൽ തെറിവിളി നടത്തിയിട്ടില്ല.

വിവാദമായ പോസ്റ്റിൽ ചിത്രങ്ങളുടെ അവലോകനം മാത്രമാണു് താങ്കൾ എഴുതിയതെങ്കിൽ ഈ കോലാഹലങ്ങൾ ഉണ്ടാകുമായിരുന്നില്ല. താങ്കളോടു ബ്ലോഗിൽ മുമ്പ് ഒടക്കിയിട്ടുള്ളവർ അവസരം കിട്ടിയപ്പോൾ അതു വിന്യോഗിച്ചു.

താങ്കളുടെ ഭാഷയിൽ അരോചകമായ വാചകങ്ങളും, ജാതി വിദ്വേഷങ്ങളും എല്ലാം മുഴച്ചുനില്കുന്നതു് ശ്രദ്ദിക്കാതിരിക്കാൻ കഴിയില്ല. വളരെ പണ്ടു തന്നെ പലരും ഇതു് ചൂണ്ടിക്കാണിച്ചിട്ടുള്ളതാണു്. അരോടെങ്കിലും എതിർപ്പ് രേഖപ്പെടുത്തുന്നതിൽ തെറ്റില്ല. പക്ഷെ ആ പേരിൽ ഒരു ജാതിയിൽ പെട്ട എല്ലാവരെയും ചേർത്ത് ആക്ഷേപിച്ചാൽ എല്ലാവരും വെറുതേയിരിക്കില്ല.

താങ്കൾ നായന്മാരെയും അവരുടെ സ്ത്രീകളേയും കൂട്ടമായി ബ്ലോഗിലൂടെ ആക്ഷേപിച്ചു എന്നാണു് ആരോപണം ഉയർന്നിരിക്കുന്നതു്. ഇതു വഴി താങ്കൾക്ക് അനേകം നായന്മാരുടെ ശ്രദ്ധയും ശത്രുതയും സമ്പാതിക്കാൻ കഴിഞ്ഞു. ഇതിന്റെ ആവശ്യമൊന്നുമില്ലാതെ തന്നെ നല്ല രീതിയിൽ കാര്യങ്ങൾ അവതരിപ്പിക്കാമായിരുന്നു. പിന്നെ തെറി വിളിക്കണം എന്നു് നിർബന്ധം ഉണ്ടെങ്കിൽ ഒന്നോ രണ്ടോ നായന്മാരെ ഒരു സൈടിലേക്കു് മാറ്റി നിർത്തി സ്വകാര്യമായി നല്ല തെറി വിളിക്കാമായിരുന്നു. പ്രതികരണവും ഒത്തുതീർപ്പും എല്ലാം അപ്പോഴെ കഴിഞ്ഞേനെ.

ചിത്രകാരൻ ബ്ലോഗ് എഴുതാൻ തുടങ്ങിയ കാലത്തു് എന്തൊക്കെ കോലാഹലങ്ങളായിരുന്നു. എന്നാൽ കഴിഞ്ഞ കുറച്ചു കാലം കുഴപ്പം ഒന്നുമില്ലായിരുന്നു എന്നു തോന്നുന്നു. ഇപ്പോൾ ഇതേ അസുഖം വീണ്ടും തുടങ്ങിയിരിക്കുന്നു.


ഈ പ്രശ്നം കോടതിയിൽ പോയാലും പോയില്ലെങ്കിലും ചിത്രകാരൻ ഒരു സമുദായത്തെ മൊത്തം ആക്ഷേപിച്ചു എന്ന ആരോപണം ഉയർന്ന സ്ഥിദിക്ക് താങ്കൾ ഒരു ക്ഷമാപണം നടത്തുന്നതു് എന്തുകൊണ്ടും നന്നായിരിക്കും. അതിലൂടെ ചിത്രകാരൻ എന്ന തറ ബ്ലോഗറിൽ നിന്നും ഒരു പുതിയ ബ്ലോഗർ ഉണ്ടാകും എന്നു കരുതുന്നു.

ഈ പോസ്റ്റിന്റെ താഴെ കാണുന്ന survey ശ്രദ്ദിക്കുമല്ലോ. ഇതിൽ നിന്നും താങ്കൾ അറിഞ്ഞിരിക്കേണ്ടതു് ഇത്രമാത്രം: ഭൂരിഭാഗം ബ്ലോഗ് വായനക്കാരും തുറന്ന മനസ്സുള്ളവരാണു്. താങ്കൾ എഴുതുന്ന വിഷയങ്ങളും ഇഷ്ടപ്പെടുന്നു പക്ഷെ അധികം പേർക്കും താങ്കളുടെ ഭാഷ ഇഷ്ടപ്പെടുന്നില്ല. വിലപ്പെട്ട പലരുടെയും സമയം ഈ തലവേദനക്കായി ചിത്രകാരൻ കാരണം കളഞ്ഞു എന്നു പറയുന്നതിൽ തെറ്റില്ല. ഈ survey യിലൂടെ ഫലങ്ങൾ വായിച്ചു മനസ്സിലാക്കി നന്നാവാൻ താല്പര്യമുണ്ടെങ്കിൽ നന്നാവുക. അത്രമാത്രം.

സന്തോഷിനുള്ള മറുപടി

ശ്രീ സന്തോഷ് ചിത്രകാരനെതിരെ കേസു കൊടുത്തു എന്നു് പറയുന്ന ഈ ലേഖനത്തിനുള്ള മറുപടിയാണു് ഇതു.


താങ്കളുടെ ആദ്യത്തെ point ഇങ്ങനെ.
"1) ചിത്രകാരൻ എഴുതിയ “സരസ്വതിക്ക് എത്ര മുലകളുണ്ട്?” എന്ന പോസ്റ്റ് കാരണം അല്ല പരാതി പോയത്."

അങ്ങനെ എങ്കിൽ പിന്നെ എന്തിനു point number 18ൽ ഇങ്ങനെ പറയുന്നു

18) “ഏതെങ്കിലും ഒരു ഭക്തിസിനിമയെടുത്തു നോക്കൂ,മിക്കവാറും ദേവിമാരെല്ലാം മുലക്കച്ച മാത്രം കെട്ടിയിരിയ്ക്കുന്നതു കാണാം.
ശ്രീ.സന്തോഷ് ജനാര്‍ദ്ദനന്‍ ഇതൊന്നും കാണാത്തതോ അതോ കണ്ടില്ലെന്ന് നടിയ്ക്കുന്നതോ“ - കണ്ടില്ലെന്ന് നടിക്കുന്നത് തന്നെ. എന്താ കുഴപ്പമുണ്ടോ?


7) ചിത്രകാരന്റെ അഭിപ്രായം പാർ‌ലമെന്ററി അല്ലെങ്കിൽ പബ്ലിക്ക് ആയി പറയാതിരിക്കുന്നത് ഉത്തമം.

Parliamentary അഭിപ്രായങ്ങൾ മാത്രമെ പാടുള്ളു എന്നതു് parliamentലും കോടതിയിലും മാത്രമാണു് ബാധകം. ബ്ലോഗിൽ അങ്ങനെ ഒരു നിയമം ഇല്ല.

8) ഒരു പോസ്റ്റ് വായിച്ച്, എടുപിടീന്ന് പരാതി കൊടുത്തവനല്ല ഞാൻ. ചിത്രകാരന്റെ ബ്ലോഗ് ഹിസ്റ്ററി കാണുക.

എന്റെ blog historyയും എടുത്തു നോക്കുക. ഒരുപാടു അഭിപ്രായങളും കൊടിത്തിട്ടുണ്ട്. ഇന്ത്യയുടെ രാഷ്ട്രപതിയെ രാഷ്ട്രപത്നി എന്നു വരെ വിളിച്ചിട്ടുണ്ടു്. അതും എന്റെ സ്വരത്തിൽ podcast ആയിട്ടു തന്നെ. ദയവു ചെയ്തു് എന്റെ പേരിലും ആരെങ്കിലും ഒരു case കൊടുക്കു. Please.


9) ഞാൻ ഉൾപ്പെടുന്ന ഒരു സമൂഹത്തിനെ കരിവാരി തേയ്ക്കുമ്പോൾ, അതിൽ ഞാനും പെടും. എന്നെ ആരും കരിവാരി തേയ്ക്കാൻ ഞാൻ അനുവദിക്കില്ല. കാരണം വ്യക്തം- സ്വാർത്ഥത; സ്വന്തം കാര്യം നോക്കി പോകൽ. താറ്റ്സ് ആൾ ഫോക്സ്.

സന്തോഷിനെ കരി വാരി തേച്ചു എന്ന ആരോപണം സ്ഥിധീ(കരിക്കാനായി) കരി പുരണ്ട ഭാഗങ്ങൾ വ്യക്തമായി photo എടുത്തു കാണിക്കുന്നതും ഈ ഘട്ടത്തിൽ നന്നായിരിക്കും.

10) എന്റെ കയ്യിൽ പണവും ഇല്ല, പത്രാസും ഇല്ല. ആർക്കെതിരെയും കൊല കേസും കൊടുക്കുന്നില്ല. എന്റെ തൊട്ടു മുന്നിൽ ഇരിക്കുന്ന ഒരു “ബാഡ് എക്സാമ്പിൾ” പൊലീസ് ഡിപ്പാർട്ട്മെന്റിനു ടിപ് ചെയ്തു കൊടുക്കുന്നു. അത്ര തന്നെ.

ചിത്രകാരൻ “ബാഡ് എക്സാമ്പിൾ” ആണെന്നുള്ളതു് താങ്കളുടെ ആരോപണമാണു്. അങ്ങനെ പറയണമെങ്കിൽ ചിത്രകാരനെ മുമ്പ് കോടതി ശിക്ഷിച്ചിട്ടുണ്ടു് എന്നു് തെളിയിക്കണം. A convicted Criminal എന്നു സ്ഥാപിക്കാതെ അദ്ദേഹത്തെ “ബാഡ് എക്സാമ്പിൾ” എന്നു വിളിക്കുന്നതും മാനഹാനിയാണു്.

11) ഞാൻ ഭാരതീയൻ, മലയാളി, കേരളീയൻ എന്നീ കാറ്റഗറിയിൽ പെടും. യൂറോപ്യൻ അല്ല. സത്യം.
ഇവിടെ ഒരു ചിന്ന നിയമപരമായ പ്രശ്നമുണ്ടു്. താങ്കൾ ആരോപിക്കുന്ന കുറ്റം. ചിത്രകാരന്റെ എഴുത്തിലൂടെ ചില വിഭാകങ്ങളെ അപമാനിച്ചു എന്നുള്ളതാണു്.

പറയപ്പെടുന്ന കുറ്റം നടന്നിരിക്കുന്നതു് എവിടെയാണു് എന്നു് നമുക്ക് നോക്കാം. ചിത്രകാരൻ എഴുതിയതു് കേരളത്തിൽ ഇരുന്നാണെങ്കിലും എഴുതിയ ലേഖനം എഴുതപ്പെട്ടതു് അമേരിക്കയിൽ സ്ഥിധിചെയ്യുന്ന ഒരു കമ്പ്യൂട്ടർ hard-diskൽ ആണു്. അപ്പോൾ ലേഖനം ഇരിക്കുന്ന രാജ്യത്തു വെച്ചാണു് കുറ്റം നടന്നിരിക്കുന്നതു്. ഇന്ത്യൻ നിയമ നടപടികൾ അമേരിക്കയിൽ ഏർപ്പെടുത്താൻ കഴിയില്ല. Jurisdiction ഇല്ല.

Blogger Terms of Service വായിക്കുക.

• 15. Choice of Law, Jurisdiction, Forum. These Terms of Service will be governed by and construed in accordance with the laws of the State of California, without giving effect to its conflict of laws provisions or your actual state or country of residence. Any claims, legal proceedings or litigation arising in connection with the Service will be brought solely in Santa Clara County, California, and you consent to the jurisdiction of such courts.

16) വ്യക്തി വിദ്വേഷം = 0%. ആശയപരമായ എതിർപ്പ് = 100%
ആശയപരമായ എതിർപ്പ് ആശയപരമായി തീർക്കേണ്ടതല്ലെ?

Racial abuse നിയമപരമായി ശിക്ഷിക്കാൻ ഇന്ത്യയിൽ നിയമം ഉണ്ടു്. (IPC Section 153A.) പ്രകാരം മൂന്നു വർഷത്തെ തടവും പിഴയും ഉണ്ടു്.


1[153A. Promoting enmity between different groups on grounds of religion, race, place of birth, residence, language, etc., and doing acts prejudicial to maintenance of harmony.

പക്ഷെ ഈ കുറ്റം ചിത്രകാരൻ ചെയ്തിട്ടുണ്ടു് എന്നതിനു് വ്യക്തമായ തെളിവുകൾ വേണ്ടിവരും. ഒരു കലാസൃഷ്ടിയെ വിമർശിക്കുന്നതു് കുറ്റകരമാണെങ്കിൽ പിന്നെ കലാ നിരൂപകന്മാർക്ക് കിളക്കാൻ പോകേണ്ടി വരും. അന്ഥവിശ്വാസികൾ വീണ്ടും ശ്രദ്ധിക്കുക. ചിത്രകാരൻ വിമർശിച്ചതു് ഹൈന്ദവ വിശ്വാസികളുടെ ദേവിയെ അല്ല. ഒരു ചിത്രകാരൻ വരച്ച ചിത്രത്തിൽ കാണുന്ന രൂപത്തേയാണു്.

ദാർഫൂറിൽ മരിക്കുന്നവർ മനുഷ്യരല്ലെ?

പാലസ്തീനിൽ ഹമാസിനെതിരെ നടത്തുന്ന ഇസ്രയെൽ പട്ടാളത്തിന്റെ ആക്രമണത്തിൽ 1000 നിരപരാധികൾ കൊല്ലപ്പെട്ടു.

2009 ജനുവരി 15നു സുഡാൻ പട്ടാളം ദാർഫൂറിൽ വീണ്ടും ആക്രമണച്ചു തുടങ്ങി. ആയുധങ്ങളും റോകറ്റുകളും ഒന്നും ഇല്ലാത്ത പട്ടിണി പാവങ്ങൾക്കെതിരെയുള്ള ആക്രമണം. അവിടെ കൊല്ലപ്പേട്ടവരിൽ അധികവും കുട്ടികളും സ്ത്രീകളും ആണു്.

ദാർഫൂറികളുടെ ഏക കുറ്റം അവർ ഇസ്ലാം വിശ്വാസികൾ അല്ല എന്നുള്ളതാണു്. United Nations കണക്കുകൾ പ്രകാരം 2003മുതൽ ഇന്നുവരെ 300,000 ജനം കൊല്ലപ്പെട്ടു.

ഇനി ഒരു ചോദ്യം:
ദാർഫൂറിലെ മരണത്തിൽ ബ്ലോഗിലുള്ള മുസ്ലീം ബ്ലോഗർമാർ ആരും തന്നെ എന്താ ഒന്നും മിണ്ടാത്തതു്?

Mallu-english in google talk. But Why?

One problem with mallu english I have often noticed has been the poor construction of interrogative sentences. Recently I happen to see a status message on Google Talk. It read

"Why another life is not possible"

I could imagine a mallu nodding his head 15 degrees vertically at the end of that statement, which apparently is the universal mallu-sign for a question mark. To a non-mallu this sentence would simply be the start of an explanation to the Question: "Why is another life not possible?".

When you say "Why another life is not possible" This does not become a question till you add the most important "is" after the questioning word "Why".

Now I am uncertain whether the person intended the status as a question or as a statement. If it was a question it should have been re-phrased as "Why is another life not possible?"

I often wonder why they simply don't write the whole damn thing in Malayalam. It would make life so much easier.

നമ്മൾ എന്ത ഇങ്ങനെ?

[കുതറ അവലോകനം എന്ന ബ്ലോഗിലേക്ക് എഴുതിയതു്. commentകൾ അവിടെ ഇടുക]


ന്യൂ യോർക്കിൽ, രണ്ടു എഞ്ചിനും തകരാറിലായ വിമാനം ഹഡ്സൺ നദിയിൽ ഇറക്കി എല്ലാ യാത്രക്കാരെയും രക്ഷിച്ച സാരധിയെ ന്യൂ യോർക്ക് നഗരം civic ബഹുമതി നൽകി ആദരിച്ചു.

ഇനി ഒരു ഫ്ലാഷ് ബാൿ.
1997ൽ കണിയാപുരത്തിനടുത്തുള്ള പള്ളിപ്പുറം എന്ന സ്ഥലത്തു് കേരളത്തിന്റെ അപമ.. അല്ല അഭിമാനമായ KSRTC യുടെ ബസ്സിന്റെ brake നഷ്ടപ്പെട്ടപ്പോൾ ഡ്രൈവർ വഴിയിൽ കണ്ട ഒരു വൃക്ഷത്തിൽ ഇടിച്ചു ബസ്സ് നിർത്തി. ബസ്സിലുള്ള എല്ലാ യാത്രക്കാരും ചില്ലറ പരുക്കളോടെ രക്ഷപ്പെട്ടു. വലിയ ഒരു വിപത്തിൽ നിന്നും ബസ്സ് ഡ്രൈവർ എല്ലാവരെയും രക്ഷപ്പെടുത്തി എന്നു തന്നെ പറയാണം. പക്ഷെ ബസ്സ് നിർത്തിയ ഉടൻതന്നെ അദ്ദേഹം ബസ്സിൽ നിന്നും ഇറങ്ങി ഓടി. നാട്ടുകാരും ബസ്സ് യാത്രക്കാരും പുറകേ ഓട്ടിച്ചിട്ട് പുള്ളിയെ പെരുമാറി. അദ്ദേഹത്തിനു് അന്ന് എന്താ ആരും ഒരു ബഹുമതിയും കൊടുക്കത്തതു് എന്ന് എത്ര ആലോചിച്ചിട്ടും പിടിക്കിട്ടുന്നില്ല.

നമ്മൾ എന്ത ഇങ്ങനെ?

മണ്ണിലോട്ടം (Part 2/2)

ശ്രദ്ദിക്കേണ്ട കാര്യങ്ങൾ
നിർമ്മാതാക്കൾ നിർദ്ദേശിക്കുന്ന വിധത്തിൽ പ്രവർത്തിപ്പിച്ചില്ലെങ്കിൽ വാഹനത്തിന്റെ Transmission കേടാകാനും സാദ്ധ്യതയുണ്ടു്. 4 വീൽ ഡ്രൈവ് സംവിധാനത്തെക്കുറിച്ചു് വിശദമായ വിവരവും പ്രവർത്തന പരിധികളും വാഹനത്തിന്റെ operation manual പഠിച്ചു മനസ്സിലാക്കേണ്ടതാണു്.

Jerboa എന്ന മരുഭൂമിയിൽ കാണപ്പെടുന്ന ഒരു തരം Nocturnal (രാമൃഗം ?) എലിയുടെ കാൽപാടുകൾ

വെറുതേ മണ്ണിലൂടെ വണ്ടി ഓടിച്ചു് രസിക്കാനാണെങ്കിൽ, ഏതെങ്കിലും desert safari company-ക്കാരെ വിളിച്ചു പറഞ്ഞാൽ അവർ വന്നു നമ്മളെ കൊണ്ടുപോകുമല്ലൊ !

വാഹനം എന്നത് ഉദ്ദേശിക്കുന്ന ഇടം വരെ നമ്മെ എത്തിക്കാനുള്ള യന്ത്രം മാത്രമാണു്. ലക്ഷ്യ സ്ഥലം എത്തിക്കഴിഞ്ഞാൽ നമ്മൾ ഇറങ്ങി നടന്നു സ്ഥലത്തുള്ള പ്രകൃതി ഭംഗി ആസ്വദിക്കുക. 'പോട്ടം പിടിക്കണ സൂത്രം' ഉണ്ടെങ്കിൽ 'പോട്ടങ്ങൾ' പിടിക്കുക. ചിത്രീകരിക്കാൻ അനേകം വിഷയങ്ങൾ ഉള്ള പ്രദേശമാണു്. ഈ ലേഖനം nature photographyയെക്കുറിച്ചല്ലാത്തതിനാൽ അതിനെക്കുറിച്ചു് കൂടുതൽ എഴുതുന്നില്ല.

മരുഭുമിയിൽ നിന്നും സസ്യങ്ങളുടെയും പക്ഷികളുടെയും മുട്ടകളോ മറ്റു വസ്തുക്കളോ ശേഖരിക്കുന്നതു് കുറ്റകരമാണു്. മരുഭൂമിയിൽ വളരുന്ന സസ്യങ്ങൾ ഫ്ലാറ്റുകളിൽ കൊണ്ടുവന്നാൽ അവ വളരില്ല എന്നുമാത്രമല്ല, വീട്ടിൽ വളരുന്ന സസ്യങ്ങൾക്ക് അവയിൽ നിന്ന് പുതിയ രോഗങ്ങൾ പടരുകയും ചെയ്യും.

പക്ഷികളും മൃഗങ്ങളും അവരുടെ സാമ്രാജ്യത്തിൽ സ്വന്തം നിയമങ്ങളനുസരിച്ചാണു് ജീവിക്കുന്നതു്. നമ്മൾ അവരുടെ നീതിന്യായങ്ങളിൽ ഇടപെട്ടുകൂടാ. കുഞ്ഞു പക്ഷികളെയും ജീവികളെയും ഊളനും, കഴുകന്മാരും കൊല്ലാൻ ശ്രമിക്കുന്നതു കണ്ടാൽ നിശ്ശബ്ദമായി നോക്കി നില്കുക മാത്രം ചെയ്യുക. മനുഷ്യരുടെ sentiments ഒന്നും അങ്ങോട്ടു് പ്രയോഗിചുകൂടാ.

എലിയുടെ മാളം

തീകത്തിക്കാൻ, കണ്ണില്ക്കാണുന്ന പുല്ലും, മരങ്ങളും നശിപ്പിക്കരുതു്. പകരം, Barbecue-വിനുള്ള സാധനങ്ങൾ നമ്മൾ വാഹനത്തിൽത്തന്നെ കരുതണം. നിങ്ങൾ ഉണ്ടാക്കിയ തീ അണക്കാൻ അഗ്നി ശമനസേന മരുഭൂമിയിൽ പ്രവർത്തിക്കുന്നില്ല അതുകൊണ്ടു് തീ കൂട്ടിയാൽ, തിരികെ പോകുമ്പോൾ വെള്ളം ഒഴിച്ചു അണയ്ക്കാൻ മറക്കരുതു്.


ചില പ്രദേശങ്ങളിൽ വാഹനം ഓടിക്കുന്നതിനു് നിയന്ത്രണമുണ്ടു്. എണ്ണയും ദ്രാവകങ്ങളും കടത്തിവിടുന്ന ഭൂഗർഭ കുഴലുകൾ ഉള്ള ഇടങ്ങളിൽ വാഹനം ഓടിക്കുന്നതു് കുറ്റകരമാണു്. അങ്ങനെയുള്ള ഇടങ്ങളിൽ ചൂണ്ടുപലകകൾ വിവരം രേഖപ്പെടുത്തിയിട്ടുണ്ടാകും.

Calotropis procera

മണ്ണിലോട്ടം (Part 1/2)

ഇമറാത്തിൽ ഇപ്പോൾ ശീതകാലമാണു്. ചെറിയ തോതിൽ ചില ഇടങ്ങളിൽ മഴയും പെയ്യുന്നുണ്ട. അതി സുന്ദരവും പ്രകൃതി രമണീയവുമായ അനേകം പ്രദേശങ്ങൾ ഇവിടെയുണ്ടു്. ഈ പ്രദേശങ്ങൾ അധികവും മനുഷ്യവാസമില്ലാത്ത മരുഭൂമികളാണു്. ഖ്വാനീജ്ജ്, ഖത്ത്, വർഖ, മിർദ്ദിഫ്, ഫലജ്ജ് അൽ മു-അല്ല എന്നീ പ്രദേശങ്ങൾ പിക്നിക്കിനു പറ്റിയ ഇടങ്ങളാണു്. പിന്നെ മണ്ണിൽ വാഹനം ഓടിച്ചു് അല്പം പരിശീലനമുള്ളവർക്ക് അൽ-ഐനും നല്ല സ്ഥലമാണു്. അവധി ദിവസങ്ങളിൽ മണ്ണിൽ വാഹനം ഓടിച്ചു് കളിക്കുന്നതു ഇവിടെയുള്ളവരുടെ ഒരു വിനോദമാണു്, മലയാളത്തിൽ പറഞ്ഞാൽ "ഞങ്ങൾക്ക് ഇതൊരു ഹോബിയാണു്".

ഖത്ത്, റാസ് അൽ ഖൈമഃ

ഇമറാത്തിൽ ഈ വിനോദത്തിനു് Dune Bashing എന്നും Desert Drive എന്നുമാണു് പറയപ്പെടുന്നതു്. മലയാളത്തിൽ അനുയോജ്യം ഒരു പദം എനിക്ക് അറിഞ്ഞൂടാത്തതുകൊണ്ടു് 'മണ്ണിലോട്ടം' എന്നാക്കി .

കുടുംബമായി കഴിയുന്ന മലയാളികളുടെ കൂട്ടത്തിൽ 4X4 ഉള്ളവർ ധാരാളമാണു്. അവരുടെ പ്രിയ വാഹനങ്ങൾ പ്രാഡോയും, പജ്ജേറോയും, പാത്ത് ഫൈന്ററും, എഫ് ജേ ക്രൂസറും, ഹമ്മർ H3-യുമാണു്. ഇവ 3ലിറ്റർ മുതൽ 4 ലിറ്റർ വരെയുള്ള 6 സിലിന്റർ വാഹനങ്ങളാണു്. ഇവ മണ്ണിൽ നല്ല പ്രകടനങ്ങളാണു് കാഴ്ചവെക്കുന്നതു്. പിന്നെ ഇതിന്റെയും മുകളിൽ വരുന്ന ഇനത്തിൽ പെടുന്ന വാഹനങ്ങളാണു് ലാന്റ് ക്രൂസർ, ഹമ്മർ H2, നിസാൻ പറ്റ്രോൾ, റേഞ്ച് റോവർ എന്നീ വാഹനങ്ങൾ. ഇവ 4ലിറ്ററിനു മുകളിലുള്ള 8 സിലിന്റർ വാഹനങ്ങളാണു്.

ഞാൻ സ്ഥിരമായി വിനോദത്തിനായി ഈ പ്രദേശങ്ങളിൽ പോകാറുണ്ടു്. അവിടെ നിന്നും എടുത്ത ചിത്രങ്ങൾ നിങ്ങൾ പലയിടങ്ങളിലും കണ്ടിട്ടുണ്ടാകും. പക്ഷെ 4X4 ഉള്ള എന്റെ മലയാളി സുഹൃത്തുകൾ ആരും തന്നെ ഈ വിനോദത്തിൽ ഏർപ്പെടാറില്ല എന്നാണു് ഞാൻ മനസിലാക്കിയതു്. എന്നു കരുതി ഞാൻ പറയുന്ന പുളൂസ് എല്ലാം കേട്ടു് പിള്ളേരെയും പെമ്പെറന്നോത്തിയേയും കൊണ്ടു് ഇങ്ങോട്ടെല്ലാം വണ്ടിയും കൊണ്ടു പോയിട്ട് മണ്ണിൽ കുടുങ്ങിയാൽ, കുറ്റം എന്റെ തലയിൽ വരാതിരിക്കാനാണു് ഞാൻ ഇതു് എഴുതുന്നതു്.

കരുതലുകൾ.
1) വാഹനത്തിന്റെ Insuranceൽ off-road recovery എഴുതി ചേർക്കാൻ ഓർമ്മിക്കുക. ചില നല്ല insurance സ്ഥാപനങ്ങൾ ഈ സേവനം സൌജന്യമായി കൊടുക്കുന്നുണ്ടു്.
2) വാഹനത്തിൽ കരുതേണ്ട സാധനങ്ങളുടെ പട്ടിക:
ജാക്ക്(Jack), കെട്ടി വലിക്കാനുള്ള സ്റ്റീൽ കേബിൾ, car batteryയിൽ പ്രവർത്തിപ്പിക്കാവുന്ന എയർ കമ്പ്രസ്സർ, ടയർ പ്രഷർ ഗേജ്ജ്, ടയറിന്റെ വാൽവ് ഊരാനുള്ള 'സുന'. (അവസാനത്തെ രണ്ടു് സാധനങ്ങളും വളരെ അത്യാവശ്യമാണു്. ഇലക്റ്റ്റോണിൿ പ്രഷർ ഗേജ്ജ് വാങ്ങുന്നതു് കൊണ്ടു് കാശു് കൂടുതൽ കൊടുക്കാം എന്നല്ലാതെ അത്യാവശ്യത്തിനു് ഉപയോഗിക്കാൻ നോക്കുമ്പോൾ അതിൽ battery കാണില്ല). ഈ പറഞ്ഞ സാധനങ്ങൾ എല്ലാം ചുരുങ്ങിയ വിലക്കു തന്നെ എല്ലാ വൻ സൂപ്പർ മാർക്കറ്റിലും, Ace ഹാർഡ്‌വേറിലും ലഭിക്കും.

ടയർ പ്രഷർ ഗേജ്ജ്

3) GPS, അതായതു്, ഭൌമിക സ്ഥാന നിർണ്ണയ സംവിധാനം!(എങ്ങനെ കൊള്ളാമോ?) ഈ കുന്ത്രാണ്ടം ഇല്ലാതെ റോഡില്ലാത്ത ഏതെങ്കിലും ഗുദാമിൽ പോയാൽ തിരിച്ചു വരാൻ വളരെ ബുദ്ധിമുട്ടും. മാത്രമല്ല Civil Defence കാരോടു് സഹായം അഭ്യർത്ഥിക്കുമ്പോൾ GPS cordinates കൊടുത്താൽ അവർക്കു് നമ്മളെ കണ്ടുപിടിച്ചു് മണ്ണിൽ നിന്നും മാന്തി പുറത്തെടുക്കാനും കഴിയും.

4) ചവറു് സൂക്ഷിക്കാനുള്ള സഞ്ചികൾ. പ്രകൃതി നമ്മുടേ കുപ്പ തൊട്ടിയല്ല, അവിടം വൃത്തിയാക്കാൻ ആരും വരില്ല. നമ്മൾ പോയപ്പോൾ കണ്ട വിധത്തിൽ തന്നെ ആയിരിക്കണം നമ്മൾ അവിടെനിന്നും തിരികെ വരുമ്പോഴും.

5) പെട്രോൾ പകുതി ടാങ്കു് മതിയാകും. ഫുള്‍ അടിച്ചാൽ വാഹനത്തിന്റെ ഭാരം കൂടും. ഭാരം കുറയ്ക്കാൻ വാഹനത്തിൽ നിന്നും ആവശ്യമില്ലാത്ത സാധനങ്ങൾ (Marble, metal, roof tiles തുടങ്ങിയതിന്റെ samples, laptop, sub-woofer speaker, etc.) എടുത്തു മാറ്റുക.

6) ഫുൾ charge ചെയ്ത Mobile Phone-കൾ

മണ്ണു്
ആദ്യം നാം മനസിലാക്കേണ്ടതു് ഇമറാത്തിലെ മണ്ണു് എല്ലായിടത്തും ഒരു തരമല്ല എന്നുള്ളതാണു്. ഉണങ്ങി വരണ്ടു് കിടക്കുന്ന മണ്ണു് വളരെ മൃദുലവും ആഴമുള്ളതുമാണു്. അതിനാൽ ഉറച്ച മണലിൽ മാത്രമേ പരിചയമില്ലാത്തവർ വണ്ടി ഓടിക്കാവൂ. അൽ-ഐൻ, ലിവ, തുടങ്ങിയ പ്രദേശങ്ങളിൽ 8ലിറ്റർ വാഹനങ്ങളുമായി മാത്രമെ പോകാൻ ശ്രമിക്കാവൂ. മനുഷ്യന്റെയും, വാഹനങ്ങളുടെയും അടയാളങ്ങൾ ഇല്ലാത്തതിനാൽ ഈ പ്രദേശങ്ങളിലുള്ള മൺകുന്നുകളെ virgin sand എന്നാണു അറിയപ്പെടുന്നതു്. മഴ പെയ്തു കഴിഞ്ഞ സമയത്താണു് മണ്ണിൽ ഓടിച്ചു പഠിക്കാൻ പറ്റിയ സമയം. ഈ ദിവസങ്ങളിൽ ഇവിടങ്ങളിൽ അനേകം വിനോദ സഞ്ചാരികൾ സഹായത്തിനു് ഉണ്ടാകും.

virgin sand

ഒന്നു രണ്ടു തവണ മണ്ണിൽ വഹനം ഓടിച്ചാൽ പരിശീലിക്കാവുന്നതാണു് 'മണ്ണിലോട്ടം'. കൂടുതൽ ധൈര്യം വേണമെങ്കിൽ മണ്ണിൽ വണ്ടി ഓടിക്കുന്നതിനായിട്ടുള്ള ഒരു ദിവസത്തെ പ്രത്യേക പരിശീലനം ദുബൈയ്യിലുള്ള എല്ലാ ഡ്രൈവിങ്ങ് സ്കൂളുകളും നൾകുന്നുണ്ടു്.

സാങ്കേതികം
ഇനി അറിഞ്ഞിരിക്കേണ്ടതു് അല്പം automobile engineering ആണു്. എല്ലാ 4X4 വാഹനങ്ങളും ഒരുപോലെയല്ല നിർമ്മിച്ചിരിക്കുന്നതു്.
വാഹനം Rear Wheel Drive-ല്‍ മാത്രം പ്രവർത്തിപ്പിക്കുമ്പോൾ എഞ്ചിൻ ഉത്പാദിപ്പിക്കുന്ന ശക്തി രണ്ടു ചക്രങ്ങളിലും ഒരുപോലെ എത്തുകയില്ല. ഒരു ചക്രത്തിൽ മണ്ണിൽ നിന്നുള്ള എതിര്‍പ്പു് (ഘര്‍ഷണം) അധികമായി വരുമ്പോള്‍ diffrentialന്റെ പ്രവർത്തനം മൂലം ശക്തി എതിർപ്പില്ലാത്ത ചക്രത്തിലേക്ക് പകർന്നു കൊടുക്കും. ഇതു് എല്ലാ വാഹനങ്ങൾക്കും ഏർപ്പെടുത്തിയിരിക്കുന്ന ഒരു സംവിധാനമാണു്.

വാഹനം 4H എന്ന modeലേക്ക് മാറ്റുമ്പോൾ മുമ്പിലും പുറകിലും 60%-40 %എന്ന അളവിൽ ചക്രങ്ങൾ പ്രവർത്തിപ്പിക്കും. ഇപ്പോഴും Differential പ്രവർത്തിക്കുന്നതിനാൽ രണ്ടു് ആക്സിലും പ്രവർത്തിക്കുന്നു. പക്ഷെ ഓരോ ആക്സിലിലും ഒരു ചക്രം മാത്രമാണു് ചലിക്കുന്നതു്. ഇനി 4HL എന്ന modeൽ പ്രവർത്തിപ്പിച്ചാൽ, മുമ്പിലും പുറകിലും 50%-50% എന്ന അളവിൽ ശക്തി നൾകും. L വിശേഷിപ്പിക്കുന്നതു Differential Lock ആണു്. ഈ വിധത്തിൽ നാലു് ചക്രങ്ങളും ഒരുപോലെ കറങ്ങും. ഇനിയുള്ളതു് 4LLC. ഈ Low Gear modeൽ കൂടുതൽ ശക്തിയിൽ ചക്രങ്ങൾ കറങ്ങും. ഈ mode-ൽ വാഹനം 10 മിനിറ്റിൽ കൂടുതൽ പ്രവർത്തിപ്പിച്ചാൽ വാഹനത്തിന്റെ Transmission ചൂടാകുന്നുണ്ടു് എന്ന വണ്ടി കണ്ണുരുട്ടി കാണിക്കും. (മുന്നറിയിപ്പു് നൾകും എന്നു് !). ഈ സമയം അതിക്രമിച്ചാൽ വണ്ടിയുടെ Transmission കയ്യിൽ ഊരി വരാനും സാദ്ധ്യതയുണ്ടു്. പിന്നൊരു സമാധാനം 4LLC mode ഉപയോഗിക്കേണ്ട സന്ദര്‍ഭങ്ങൾ വളരെ കുറവാണു്. വാഹനം പൂർണ്ണമായി മണ്ണിൽ പുതഞ്ഞാൽ മാത്രമെ ഈ mode ഉപയോഗിക്കാൻ ശ്രമിക്കാവൂ.

All wheel Drive (AWD) എന്ന പേരിൽ വിപണിയിൽ ഇറക്കുന്ന ചില വാഹനങ്ങളിൽ മുകളിൽ പറഞ്ഞിരിക്കുന്ന എല്ലാ സംവിധാനങ്ങളും ഇല്ല എന്നാണു് ഞാൻ മനസിലാക്കുന്നതു്. പ്രത്യേകിച്ചു് Differential Lock ചെയ്യാനുള്ള സംവിധാനം.

ദാണ്ടെ വാഹനം മണ്ണിൽ!:
വാഹനം റോഡിൽ നിന്നും മണ്ണിലേക്കു് ഇറക്കിയ ശേഷം ടയറിന്റെ പ്രഷർ 20 psi ആയി കുറയ്ക്കുക. ഇങ്ങനെ ചെയ്താൽ ടയറും മണ്ണുമായി കൂടുതൽ ബന്ധം ഉണ്ടാകും. തിരിച്ചു് റോഡിൽ കയറിയ ശേഷം കമ്പ്രസ്സർ ഉപയോഗിച്ചു് പ്രഷർ കൂട്ടാനും മറക്കരുതു്. കുറഞ്ഞ പ്രഷറിൽ വാഹനം റോഡിൽ ഓടിച്ചാൽ ടയറിന്റെ കാറ്റു പോയിക്കിട്ടും. ടയർ ഇല്ലാതാകുമെന്നു്.

മണ്ണിൽ വാഹനം ഓടിക്കുമ്പോൾ എപ്പോഴും ഉറച്ച സ്ഥാനം നോക്കി ഓടിക്കുക. ചില ഇടങ്ങളിൽ നമ്മളേക്കാൾ നേരത്തെ പോയ അണ്ണന്മാരുടെ വാഹനങ്ങൾ സ്ഥിരം പോയതിനാൽ ഉറച്ച പാതകൾ കാണാൻ കഴിയും. ഈ പാതകൾ പിന്തുടർന്നാൽ പ്രശ്നങ്ങളിൽ നിന്നും ഒഴിവാകും.

വാഹനം മണ്ണിൽ താഴ്നാൽ:
പലർക്കും മണ്ണിൽ ഓടിക്കുന്നതിനെ കുറിച്ച് ആലോചിക്കുമ്പോൾ മനസിൽ ആദ്യം കടന്നു വരുന്ന ഭയം വാഹനം മണ്ണിൽ താഴ്‌ന്നു പോയാൽ എന്തു ചെയ്യും എന്നുള്ളതാണു്.

വാഹനത്തിന്റെ ഷാസി മണ്ണിൽ ഇരിക്കാതെ ശ്രദ്ധിക്കണം

ഓടിക്കൊണ്ടിരിക്കുന്ന വാഹനം സാധാരണ ഗതിയിൽ മണ്ണിൽ താഴില്ല. പലപ്പോഴും വാഹനം നിർത്തുമ്പോഴാണു് താഴുന്നതു്. നിർത്തിയ വാഹനം ചലിച്ചു തുടങ്ങുമ്പോഴും താഴാൻ ഇടയാകും. അതുകൊണ്ടു തന്നെ വാഹനം നിർത്തുമ്പോൾ എപ്പോഴും ചരിവിൽ കയറ്റി നിർത്തുക. അങ്ങനെ നിർത്തിയാലും പുറകിലോ മുന്നിലോ ഒഴിഞ്ഞ ഇടമായിരിക്കണം. രണ്ടു കുന്നിന്റെ ഇടയിൽ വാഹനം ഒരിക്കലും നിർത്തരുതു്.

വാഹനം മണ്ണിൽ പുതയുന്നതായി തോന്നിയാൽ, അധികം ആക്സലറേറ്റ് ചെയ്യാതെ തന്നെ, Steering Wheel നേരെയാക്കിയ ശേഷം Transmission , 4HLCയിലും പിന്നെ 4LLC modeലേക്കു മാറ്റി ഒന്നുകൂടി പയറ്റി നോക്കണം. (Steering Wheel നേരെ അല്ലെങ്കിൽ Automatic Transmission ഉള്ള വാഹനങ്ങളിൽ 4LLC mode പ്രവർത്തിക്കില്ല.)

ഇതൊന്നും നടന്നില്ല എങ്കിൽ വാഹനത്തിൽ നിന്നും ഇറങ്ങി ടയറിന്റെ പ്രഷർ 10psi ആയി കുറയ്ക്കുക. വാഹനത്തിന്റെ ഷാസിയും (chassis) തറയുമായി മുട്ടാതെ നോക്കുക. ഇനി എത്ര വമ്പൻ വാഹനമാണെങ്കിലും ഷാസി മണ്ണിൽ ഇരുന്നുപോയാൽ ചക്രങ്ങൾ തറയുമായി ബന്ധമില്ലാതെ വെറുതെ കറങ്ങി തുടങ്ങും. ഇവിടെയാണു് ആദ്യം പറഞ്ഞ Off Road recoveryഉള്ള Insurance Company എന്ന മർമ്മ പ്രധാനമായ കാര്യം ആവശ്യമായി വരുന്നതു്.
അവർ വന്നു നിമിഷ നേരം കൊണ്ടുതന്നെ വണ്ടി വലിച്ചു പുറത്താക്കി തരും.

നിർത്തുമ്പോൾ എപ്പോഴും ചരിവിൽ കയറ്റി നിർത്തുക

20 വർഷത്തെ സംഭവബഹുലമായ ജീവിതത്തിന്റെ ഇടയിൽ രണ്ടു തവണ മാത്രമാണു് ഞാൻ മണ്ണിൽ പെട്ടതു്. ഒരിക്കൽ എന്റെ ആന മണ്ടത്തരം കൊണ്ടും, പിന്നെ ഒരിക്കൽ ദൌർഭാഗ്യം കൊണ്ടും.

"എന്തിനു് ഇതു് ചെയ്യണതു് പുല്ലെ?"
"ഇങ്ങൻ ബെദ്ധപ്പെട്ട് എന്തിനിടെ പുല്ലെ ഇതൊക്കെ ചെയ്യണതു്?"
മണ്ണിലോട്ടം ഒരിക്കൽ ചെയ്താൽ എപ്പോഴും ചെയ്യാൻ തോന്നുന്ന വലിയ ചെലവില്ലാത്ത രസകരമായ ഒരു വിനോദമാണു്. മാത്രമല്ല പ്രകൃതി സ്നേഹിയാണെങ്കിൽ പഠിക്കാൻ ഒരുപാടു കാര്യങ്ങളുണ്ടു്.

അനേകം സസ്യങ്ങളും പ്രാണികളും പക്ഷികളും ഇഴ ജന്തുക്കളും മൃഗങ്ങളും നിറഞ്ഞ പ്രദേശമാണു് ഇവിടം. മരുഭൂമിയിലെ ജീവികളും മറ്റുള്ള പ്രദേശങ്ങളിലെ ജീവികളെ പോലെ ശത്രുജീവികളില്‍ നിന്നു് സ്വയം സംരക്ഷിക്കാന്‍ കപടാവരണം ധരിക്കുന്നതിനാല്‍ കണ്ണില്‍പെടാന്‍ പ്രയാസമാണു്. അതുകൊണ്ടു് കണ്ണുണ്ടായാൽ മാത്രം പോര, അവയെ കാണണമെന്നു കരുതി നോക്കുകയും വേണം. അങ്ങനെ നോക്കുന്നവനു മാത്രമെ അവയെ കാണാൻ കഴിയൂ.

രണ്ടാം ഭാഗം